ఇడ్లీకి - రసగుల్లాకు పోలిక పెట్టడంపై శశిథరూర్ అద్భుత విశ్లేషణ

సోషల్ మీడియా వేదికలపై రోజుకో అంశంపై చర్చలు, వాదోపవాదాలు నడుస్తూనే ఉంటాయి. అయితే, చాలామంది వాదించే క్రమంలో సహనాన్ని కోల్పోతుంటారు. కానీ, దక్షిణ భారతదేశపు అత్యంత ప్రజాదరణ పొందిన అల్పాహారం 'ఇడ్లీ' గౌరవాన్ని కాపాడటానికి ఒకరు మాత్రం తనదైన శైలిలో అత్యంత మేధోపరమైన, భాషా చమత్కారంతో కూడిన సమాధానాన్ని ఇచ్చారు. ఆయనే తిరువనంతపురం లోక్‌సభ సభ్యుడు, కాంగ్రెస్ నేత శశి థరూర్.

ఈ మొత్తం వ్యవహారం ఒక ఎక్స్ వినియోగదారుడు చేసిన వివాదాస్పద పోస్ట్‌తో మొదలైంది. బెంగాలీ స్వీట్ 'రసగుల్లా'ను విమర్శిస్తూ.. "రసగుల్లా అనేది మరేదో కాదు.. కేవలం చక్కెర పాకంలో ముంచిన ఇడ్లీ మాత్రమే. ఇప్పటివరకు ఉన్న డెసెర్ట్స్‌లో దీనికి మాత్రమే అవసరానికి మించిన హైప్ ఇచ్చారు" అని ఆ యూజర్ రాసుకొచ్చారు. ఈ పోస్ట్ కాస్తా సోషల్ మీడియాలో వైరల్ కావడంతో, మరొక యూజర్ స్పందిస్తూ.. "ఒకవేళ ఈ స్టేట్‌మెంట్ కనుక డాక్టర్ శశి థరూర్ దృష్టికి వెళితే, ఇక ఒక అద్భుతమైన భాషా ప్రవాహంతో కూడిన 'లింగ్విస్టిక్ అస్సాసినేషన్' (భాషా పరమైన హననం) చూడటానికి సిద్ధంగా ఉండండి!" అంటూ కామెంట్ చేశారు.

నెటిజన్లు ఊహించినట్లుగానే ఈ పోస్ట్ శశి థరూర్ దృష్టికి వెళ్ళింది. ఇంకేముంది, ఆయన వెంటనే తన అధికారిక ఎక్స్ ఖాతా ద్వారా రంగంలోకి దిగి, రసగుల్లాతో పాటు ఇడ్లీని కూడా సమర్థిస్తూ తనదైన విలక్షణమైన, అలంకారిక శైలిలో ఒక సుదీర్ఘమైన నోట్ రాశారు. రెండింటి మధ్య పోలికను పూర్తిగా తిరస్కరించారు.

"ఒక రసగుల్లాను ఇడ్లీతో పోల్చడం అనేది కేవలం ఒక వంటకానికి సంబంధించిన తప్పు మాత్రమే కాదు. అది విశ్వసృష్టికి సంబంధించిన ఒక తీవ్రమైన అపార్థం" అంటూ థరూర్ తన శైలిలో విశ్లేషణను ప్రారంభించారు. ఇడ్లీ, రసగుల్లాల తయారీ విధానాన్ని, వాటి ప్రత్యేకతలను శాస్త్రీయ కోణంలో పోలుస్తూ ఆయన మరింత లోతుగా వివరించారు. 

"మొదటిగా చూస్తే, ఈ రెండింటి మధ్య పోలిక అనేది ఆచరణాత్మకంగా ఒక జీవసంబంధమైన అసాధ్యం. ఆమె (నెటిజన్) పాలు విరగ్గొట్టి చేసే అత్యంత సున్నితమైన, పవిత్రమైన 'ఛేనా'ను... ఉప్పుడు బియ్యం, మినప్పప్పుల మిశ్రమంతో ఎంతో శ్రద్ధగా పులియబెట్టిన పిండితో పోలుస్తోంది. వీటి నిర్మాణాలు పూర్తిగా వేర్వేరు సామ్రాజ్యాలకు చెందినవి. ఒకటి చక్కెర పాకాన్ని తనలో ఇముడ్చుకోవడానికి వీలుగా ఉండే గాలితో కూడిన, మెత్తని అమరిక. మరొకటి కాంప్లెక్స్ కార్బోహైడ్రేట్లు, ప్రొటీన్లతో కూడిన దట్టమైన, ఆవిరిపై ఉడికించిన పోషకాల గని. వీటి రుచి, స్థిరత్వం, నిర్మాణాత్మక సమగ్రత మధ్య ఎలాంటి పోలిక లేదు" అని పేర్కొన్నారు.

అంతటితో ఆగకుండా, దక్షిణ భారతీయ ఇడ్లీని "వంటల ప్రపంచంలోనే అత్యంత గొప్ప ఇంజనీరింగ్ అద్భుతం" అని థరూర్ కొనియాడారు. ఇడ్లీని కేవలం చక్కెర పాకం కోసం వాడే ఒక ఖాళీ కాన్వాస్ లాగా చిత్రీకరించి తక్కువ చేయాలని చూడటం, వంటల ప్రపంచంలోనే ఒక అద్భుతమైన సృష్టికి చేస్తున్న తీవ్రమైన అన్యాయమని ఆయన తన పోస్ట్‌లో స్పష్టం చేశారు. ఒక సాధారణ ఆహార పదార్థంపై జరిగిన చర్చను కూడా శశి థరూర్ తన అద్భుతమైన పదజాలంతో ఎంత ఉన్నతంగా మార్చారో ఈ ఘటన చూపిస్తుంది.